معلومات مهمة عن تقليل الاغتراب والتحويل
تقليل الاغتراب او التحويل بيكون رغبة واحدة فقط لاقرب جامعة في المسافة.
اي الفرق بين تقليل الاغتراب والتحويل؟
تقليل الاغتراب المناظر: انك تحول من كليه بره محافظتك لنفس الكليه جوا محافظتك حتى لو مجموعك اقل من محافظتك و ده اسمه تقليل اغتراب مناظر وفي نسبه 10%
التحويل (تقليل اغتراب غير مناظر): بتحول من كليه سواء جوه محافظتك او بره محافظتك لكليه تانيه جديده جوه محافظتك ولازم تكون جايب مجموعها في محافظتك
الطلاب اللى هتقدم على تقليل الأغتراب :
• لازم تحدد الاول انت عايز تعمل تقليل اغتراب : بمعني انت في محافظة بعيدة ف عايز تحول لمحافظة اقرب ليك وتكون نفس الكلية فيها ؟ ( تحويل مناظر )
• أو انت عايز تحول من الكلية : بمعني إنك مش عايز الكلية اللي جاتلك وعايز كلية تانية ؟ ( تحويل غير مناظر )
_• لازم تكون مقرر حاجة واحدة فقط من الاتنين دول √ .
_________________ .
• بالنسبة لـِ تقليل الاغتراب كل ما تكون قريب للكلية اللي بتعمل ليها تقليل اغتراب كل ما كانت فرصتك في القبول اكبر √ .
• لازم تقليل الاغتراب يكون لكلية من نطاق ( أ ) يعنى لو جيت تعمل تقليل اغتراب من مكان بعيد لكلية خارج نطاق ( أ ) هيقولك خطأ في التوزيع الجغرافى زى الرغبات كده بالضبط . √
_ مثلا لو جالك اداب أسيوط و أنت من بورسعيد لازم لما تيجي تعمل تقليل اغتراب يبقى للجامعات التالية ( بورسعيد – قناة السويس- دمياط ) – فيما يعني نطاق ( أ ) √
• لازم تختار الأقرب لمجموعك فيهم .√
_ في حالة ان تقليل الاغتراب اترفض :
• ممكن تعمل تقليل اغتراب كمحاولة تانية ، لما يفتح تقليل الاغتراب للمرحلة الثالثة .
• في حاله اترفض تاني :
• هيفضل قدامك حل واحد فقط” و هو انك هتفضل فى الجامعة بتاعتك دى سنه” و بعدين هتقدم طلب تحويل ورقى بيبقى بين الجامعات و بعضها و مالوش علاقه بالتنسيق . طب لو مش عاوزه يترفض تاني يبقي تحول كليه تانيه مجموعك جايبها
_ بالنسبة لـِ الانتساب و الانتظام في تقليل الاغتراب :
• لو مثلاً جالك كلية اداب أسيوط ( انتظام ) وأنت من المنصورة وعايز تعمل تقليل اغتراب بس مش عارف هتروح على المنصورة على انتظام ولا انتساب ؟!
• في طريقين √
• الاول : لو مجموعك اعلى من انتساب المنصورة يتم تحويلك على الانتظام .
• التاني : لو مجموعك أقل من او يساوى انتساب المنصورة يتم تحويلك على نظام الانتساب .
_________________ .
الطلاب اللي عايزة تحول من كلية لكلية تانية :
• كذلك التحويل لـِ كلية تانية لازم يكون داخل التوزيع الجغرافي بمعنى لو كليه اداب القاهره و عايز تحول تجاره – على سبيل المثال .
• يبقى لازم تحول لـِ تجاره القاهره أو عين شمس أو حلوان شرط تكون جايب مجموع تجاره فى الجامعة اللى عايز تحول ليها .
عندك مثلا جالك تجاره المنصوره وأنت مش حاببها تقدر تعمل تحويل من تجاره لاداب بس شرط تكون جايب مجموع أداب ( تجارة المنصوره >>>> اداب المنصوره )
(تجارة المنصورة >>>> اداب القاهره ) لا عشان الموقع
تقليل الاغتراب بيقبل على أساس اى ؟
تقليل الاغتراب بيقبل بنسبه 10% بمعنى لو تجاره المنصوره بتقبل عدد طلاب 100 طالب وتقليل الاغتراب جابلها 10 طلاب كمان ( اللى هما 10% من 100 ) يبقى كدا 110 طالب طيب نفترض ان فى 20 طالب عاملين تقليل الاغتراب للكليه ساعتها الكليه هتقبل أعلى 10 فيهم من حيث المجموع
الخلاصه كل مامجموعك قريب من تنسيق الكلية فرصتك كبيره فى التحويل
طيب لو انا عملت تقليل الاغتراب واترفص كدا هفضل فى أخر الدنيا ؟
هيبقى قدامك حلين الاول تحويل ورقى بين الجامعات ( ودا مش كل الجامعات بتقبله للاسف )
أو هتقدم التمس طبى فى الوزاره مرفق معاه شهاده طبيه انك تعبان ومينفعش ليك سفر ودا برضوا انت وحظك
الحل التالت هتفضل سنه فى الكلية وبعدين تحول ( ودا سهل شويه )
استفادو بقي قبل ما الموقع يفتح وكل واحد يرتب اولوياته
